A posición da AEAT nos procesos concursais
Saltar índice da informaciónProblemas de xestión en reaperturas de concursos
Xeitos de comunicación á AEAT das reaperturas de concursos.
O artigo 21.4 da Lei concursal, na redacción dada por Lei 38/2011, do 10 de outubro, impuña á administración concursal a obriga de comunicar á AEAT a declaración de concurso polos medios que esta habilitase na súa Sede electrónica.
O artigo 33 g) 1º da Lei Concursal, na redacción dada pola Lei 17/2014, do 30 de setembro, pola que se adoptan medidas urxentes en materia de refinanciamento e reestruturación de débeda empresarial, reforzou esta obriga ao establecer como funcións de secretaría dos administradores concursais a “comunicación electrónica da declaración de concurso á Axencia Estatal da Administración Tributaria e á Tesourería Xeral da Seguridade Social”.
Co fin de atender o mandato establecido no artigo 21.4 LC, a Axencia Tributaria introduciu na súa Sede electrónica un formulario que deberá cubrir o administrador concursal. O devandito formulario permite comunicar os mesmos datos que figuran no extracto de publicación do concurso no BOE a que se refire o artigo 23.1 LC.
Non se permite presentar outro formulario de comunicación de concurso co mesmo número de procedemento e Xulgado porque podería provocar unha duplicidade de expedientes.
A Lei concursal, ao regular a reapertura do concurso, non prevé unha obriga similar de comunicación na sede electrónica. Á reapertura de concurso, tal como dispón o artigo 179 da Lei Concursal, “se lle dará a publicidade prevista nos artigos 23 e 24, procedendo tamén a reapertura da folla rexistral na forma prevista no Regulamento do Rexistro Mercantil.” Polo tanto, co sistema actual, e xa que non se pode facer uso do formulario anteriormente mencionado (ao coincidir número de procedemento e Xulgado), a forma de poñer en coñecemento da AEAT a reapertura do concurso sería mediante o envío dun correo electrónico ao enderezo habilitado, anexando a documentación necesaria.