As estatísticas tributarias publicadas recentemente permiten empezar a ter unha visión completa do que foi o ano 2023. No último mes coñecéronse os datos de decembro de vendas, emprego e salarios das Grandes Empresas e do comercio exterior, e os datos do cuarto trimestre de vendas, emprego e salarios das Grandes Empresas  e das pemes  societarias. Estas últimas pechan tamén o exercicio para o Observatorio de marxes empresariais. Así mesmo, completouse a información anual na Estatística do Imposto de Matriculación de Vehículos Automóbiles. Falta por coñecer a información sobre a recadación de decembro que, como é habitual, publicarase a finais de marzo.

Os trazos básicos que caracterizaron a evolución das vendas, o emprego e os salarios nas Grandes Empresas e pemes societarias, os indicadores fiscais de maior cobertura, foron cinco: a moderación no ritmo de crecemento das vendas; o diferente comportamento das exportacións (cun mal segundo semestre do ano) e das vendas interiores (que repuntaron nos últimos meses); o menor incremento dos prezos; o crecemento robusto e estable do emprego, aínda que a taxas inferiores ás de 2022 que reflectían a comparación cun ano 2021, que aínda non acadara nalgunhas actividades a plena normalidade; e o aumento dos salarios medios por riba do 5 %, consecuencia atrasada e incompleta das subidas de prezos dos anos anteriores. Eses cinco elementos sintetízanse nos seguintes gráficos:

O empeoramento ao longo do ano das exportacións pódese analizar con máis detalle acudindo ás Estatísticas de comercio exterior. Os gráficos que se mostran a continuación debuxan a traxectoria das exportacións de bens e do saldo comercial. Pódese ver como a partir de abril as exportacións entraron en terreo negativo. Xa que as importacións tamén caeron desde esa data, o saldo comercial logrou permanecer relativamente estable gran parte do ano, mellorando os resultados rexistrados en 2022.

A moderación do ritmo de crecemento das vendas en 2023 que se citou como un dos trazos distintivos do ano, pode dar lugar a unha interpretación da conxuntura do ano máis negativa do debido se non se ten en conta ao mesmo tempo a evolución das compras. Os datos que acompañan os informes de Grandes Empresas e pemes societarias ofrecen esa información, que tamén se pode encontrar, para un colectivo de empresas algo menor, no Observatorio de marxes empresariais. No gráfico seguinte preséntase esa relación entre vendas e compras e a súa diferenza, o indicador de valor engadido. Como se pode apreciar, o magro crecemento das vendas foi compatible cun aumento do valor engadido superior ao 8 %, grazas á práctica estabilización das compras.

Precisamente ese forte incremento do valor engadido fixo posible que, a pesar das subidas de salarios e da creación de emprego, o resultado bruto de explotación seguise medrando. De acordo á información que recolle o Observatorio, e proxectando a conta de perdas e ganancias a 2023 cos resultados do IVE e das retencións do traballo, o resultado bruto de explotación das sociedades non financeiras medraría por riba do 5 %e a marxe con respecto ao valor engadido situaríase nos dous últimos anos nos máximos desde 2009. O seguinte gráfico ilustra esa evolución:

Por último, hai que indicar a publicación do dato anual de 2023 da Estatística do imposto sobre matriculación de vehículos automóbiles. O dato final do ano, que se coñeceu en forma de avance con anterioridade, indica que o número de matriculacións medrou un 12,9%, a cifra máis alta desde 2016, e que o tipo medio interrompeu o ascenso que viña mostrando desde o mínimo tamén daquel ano.