Informes anuais de Recadación Tributaria
O obxectivo é ofrecer información sobre o nivel e a evolución anual dos ingresos tributarios que xestiona a Axencia Tributaria (AEAT ) por conta do Estado, as CCAA e as CC. LL. do Territorio de Réxime Fiscal Común.
O Informe Anual de Recadación Tributaria utiliza un método de análise na que non só se analizan os ingresos tributarios en termos de caixa, senón que estes se vinculan cos impostos devindicados obtidos por agregación das declaracións e estes, á súa vez, cos tipos efectivos e as bases que declaran as persoas contribuíntes. Así, o esquema de explicación en cada figura tributaria ten tres niveis:
- Análise da evolución da base impoñible e do tipo medio efectivo, nivel en que a fonte básica de información son as estatísticas anuais dispoñibles na páxina web da AEAT.
- Análise da evolución dos impostos reportados, elaborados a partir das declaracións-autoliquidacións periódicas presentadas polos contribuíntes en cumprimento das súas obrigas fiscais.
- Análise da recadación en termos de caixa, detallando os elementos que puidesen influír nun comportamento distinto dos ingresos con respecto ás obrigas xeradas.
O esquema utilizado trata de cubrir todo o proceso de pagamento dos impostos: desde que se produce o feito impoñible que xera a obriga para o contribuínte ata que finalmente se liquida e ingresa o imposto. É preciso sinalar que, en xeral, a información sobre bases impoñibles e impostos reportados dos dous últimos anos ten carácter provisional.
